|
Cissy Ogwal opako kanica
J.B. Okwir
MP me Lira Municipality, Imat Cecilia Atim Ogwal, opwo atek kanica pi tute gi me gwoko oring ayela.
Imat Ogwal onwongo i 27.1.2005 tye alok kede bulu me LPC ite eryonget me tuku goga olwongo ni LPC Youth Drama Group kede eryonget okene me pito yen olwongo ni Christian Youth Initiative for Development.
Ogwal ocikere me miyo 200,000/= bot eryonget me tuku goga pien en neno tuku man calo gin apire tek ka pwonyo lwak iber bedo.
Ilokere kede lwak, akwat a bulu me LPC Assembly, Johnny Awongo Aleri, otito ni eryonget man me goga tye pi pwonyo lwak me lobo man ikom rac ideke me two jonyo kede lweny me tung malo me Uganda.
Atel bulu me kanica me LPC, Wassington Okello, i lokere kede lwak, otito ni eryonget a bulu me pito yen tye me yubu ber bedo a bulu iyele gi itic me kanica.
Imat Ogwal opwo eryonget a bulu me LPC, akato mere me tuku goga, pi yele gi me pwonyo lwak.
Itungcel, Patrick Okino coo ni bulu ame cwako Movement i Lira Municipality otyeko cikere me reto oko MPs ame wakere ni gin obedo UPC oywek.
Bulu ite wonkom gi Kim Wagulu ocikere me cwako Sam Engola wek ret Cecilia Ogwal.
Published on: Wednesday, 9th February, 2005
|
