 | |
ATEKA: Lyeli Major Ben Olila apwod kwo |
James Oloch
MAJ. Ben Olila, oto i tute me kelo kuc i tung malo me Uganda ika poro lok me Juba, kan ame en onwongo tye acung akaka Won Nyaci me Lango iye.
Lobo Sudan lyet atek, omio pressure kede two remo ame en otwo pi mwaki 10 twali ni te mede oko, dako a lyeli Major Olila, Anna Olila en okobo.
“Adwonga oto iyo pi kelo kuc tung malo, en odyero kwo mere pi tung malo,”Anna Olila otito kun mede ni ikare ame cware odwogo paco iya i Juba cwinye onwongo otur atek ikare ame owang LRA okwero keto cing, man te miyo cwinye owang te miyo two pressure yito malo.
Ocwale Ayira Nursing Home te bedo iye dwete aryo inucu. Lego ajo omio Obanga te mede dwete moro anonok, jo apol ata olego pire, aco atuc jiri John Opio obedo bino paco kun lego ikome.
Nying aber kato lonyo, omio jo ikanica apapat duc olego pi Ben, naka cente me twoyo pe ocato gweno onyo dyeloro ipaco ento jo en okonyo wa icente kede otino I ooko.
Major Olila oto ame gamente tye kede banya mere ame oyito kede dege tyen aryo wot idwogo aperu odwoke. Dr. Ruhakana Rugunda obin okobe ni ket icoc wek cule, wel cente pe ongeo pwod.
Lyeli Olila cwinye ler, akica, konyo ngatoro keken ipeko dok en kobo kede dano alubo mwaka adano moro ni. Oto ame maro jo duc ento akadi okwore moro tye, pe angeo, dok oto ame olare oko. En oweko mon aryo, Evaline Rose Apio kede Anna Betty Olila kede otino 12.
Major Olila obedo oteka angeye atek iryemo Idi Amin iloc me nek aconya, ikare ame gin obedo i Tanzania bala oringi, inge Amin ituru gamente me UPC, ikare ame preciden Dr.Apollo Milton Obote owoto icokere me Comonwealth i lobo Singapore i 1971.
Pi ngec olagaro ame Major Ben Olila tye kede diro, Won Nyaci Yosam Odur obin ocime me cung kakare iporo kop i Juba. En oto oweko poro kop peru otum. Ben Olila obedo dano acel a Langi onwongo tye imara kede woro ikome atek pi ngecere duc ame ka amiyo tam mio tam me kuc, noto jo kede mara abongo apokapoka.
En obin otio I gamente Obote 1, acalo Assistant Chief General Service Officer, man rwom me mony, jo abedo acegi kede preciden kun lubo kor Akena Adoko.
Ikare Amin oturo loc, gin onwongo tye i palaimen kede lyeli Major General David Oyoite Ojok, Akena Adoko, gin ote pango mony Amin ame oguro paliamen me mako gi me aneka ote ringo i Kenya kun olubo Obote i lobo Tanzania.
Olila obin owoto ikwan ilobo Sudan, i Owiny Kibul pi turu loc Amin. I 1974 obin otelo wi mony me turo loc Amin kun beo i Mbarara ento Amin ote bin oneko gi alit kun obwot ka jo 9 keken.
Lyeli Major Ben Olila obin otio acalo aran pi kampuni me STAMICA I Tanzania, dok ote cime irwom me Commissioner kun omede dok rwom okene me General Manger me Game stone Industries, HQs Arusha, Tanzania.
1979 obin ocako lweny naka ituro gamente Amin Dada. Obote kono dang obin ocwale i angica inge dok te cime me bedo General Manger me Uganda Tourist development Cooperation naka I 1984 te weko tic i 1985.
Major Olila dok te ngwec pi laro kwo mere ame ogamo loc Obote me aryo. En odwogo i Uganda 1986 ikare preciden Museveni lwong kede onywali duc me Uganda me dwog paco.
Ben Olila onywalo I 16.10.1939 i Lira taun, kun papere onwongo rik obedo Solomon Oyuku kede Imatere lyeli Yonia Akullo, en obedo atin me aryo ipaco gi. En ocako kwan i 1947 I Barr i Erute, te mede ikwan Ireda p7 school.
En owoto okwano Junia I Boroboro pi mwaki aryo te wot kwano O’Level, Busoga College Mwiri 1951. En obin okato aber te wot kwano A’level I Ntare school 1962-1963 te kato wot i Makerere University te wado digiri. En odonyo itic agemente i 1967 naka i 1971 te ngwec weko tic pi gwoko kwo.
En okwano Post Graduate diploma, State i lobo Isarel 1969, te dwogo naka imuko rwom me Assistant Principal Secretary. Ikare ame en odwogo iooko obin oyere acalo akancila LC5 pi Ayer i Apac district council dok ote cime me bedo aran pi kuc.
Otio tic apapat calo wonkom me Board me Lira Town College, wonkom me Apac District Service Commission.
Major Olila oto ame obedo awitong me Pala Ocol, obedo minister me Peace, Gender kede Youth i gamente a Won Nyaci muje Yosam Odur, kana to ongole iye. Major Ben Olila, wot ikuc, Obanga en angeo kwene aketi iye alubere itic itio ilobo.
Published on: Wednesday, 24th October, 2007
|
