 |
|
ORUKU WARO EPAK: Otto Issa |
Acoc me Rupiny
CARO kop a Lango kobo ni gum awoti pe bedo megi dok gum pe goo dogola iryo. Nelson Adea obin ongweco te weko gumere oko bot Ishaa Otto.
Icabit okato otedero me Oyam South obin ogungu kor gi eka ote yero Otto (UPC) pi leyo wang Dr Yefusa Okullo Epak iyonge dipowic kur agwao ikin UPC kede acilalic pi laro Adea.
Yera man obin otum apwot alubere kede lok awonkom me yera pi Uganda Dr Badru Kigundu akadi kono bed ni Langi obin obedo tubere kun jo yete kede leb akec ikom ikare ame oyero Adea me cung ite pati me UPC eka dok te ngolo lek arii naka iyi acilalic.
Boli Oto kwir pe nyutu ni jo me Oyam maro Oto ento Langi me Oyam obin onyutu akemo gi ikom Adea iyonge gin keto gen ikome eka te dok te loko wie oko.
Pol ajo obin obedo tamo ni Oto okato pien onwongo tye ite pati me UPC kede ni omio ocwak UPC obedo goyo cim iradio me cayo acilalic.
Amito ni okwan Rupiny nyang ni acilalic rik koko atek ikom otela me UPC iLango ni opungu gi oko ento aworo maca ikare ame oketo gen ikom Adea eka ote yere me tingo bendera me UPC obin dok omukere kede tamere te weko gen ame jo oketo ikome oko.
Man te miyo jo Oyam nyang aber ni rucurucu ame rik tye okur ipati me UPC pe onwongo obedo kada yika otela mere keken ento jo ame kobo ni gin obedo acilalic dang tye kede bal iye.
Man mia akobo ni Adea opoto pien obwolo Langi ni edok oko ipati me UPC dok obin oloko naka iradio ni en eye timo kica pi bale lung ame rik otimere.
Kadi kono bed ni acilalic tye akobi ni pati me UPC dong tye ato atoa dok pe bino dok iloc atwali ento anyim me bolo kwir pi mwaka 2011 nen cali gin ame pe abedo aber tungbot acilalic.
“UPC pe bino dok iloc atwali dok atamo ni gin otye olek,” minisita me kila kede dongo boma ame dang obedo MP me Otuke Daniel Omara Atubo obin otito ikare ame tye abito kwir pi Patrick Ogwang Adaa.
Teka a UPC ocakere ikare me oyero wonkom me Apac, Nicholas Opio Bunga.
Published on: Wednesday, 27th June, 2007
|
